الحب أم المال ..... أيهما تختار ؟

يوم جايبتلكن الموضوع من برنامج كنت عم اسمعه على الراديو ....... فحبيت شوف أرائكم بالموضوع ......
يمكن هيي قصة من بين مئات القصص المشابهة اللي عم تصير كل يوم .........
شب وصبية ..... كانوا يحبو بعض كتير وبقيوا سنين ... سوا عالحلوة والمرة ... ومتفقين ومخططين لحتى يجي الشب يخطبها ... وللمستقبل ..... بفترةمن فترة علاقتهم .... حسها اتغيرت .... صار لما يدقلها عالتلفون ...... دايما يطلعلو مشغول ... ولما بترد .... بيقلها بدي شوفك اليوم .... بتقولو ماني فاضية .... طيب بكره ... لاء رايحة مع رفقاتي ......
احتارالشب بأمره ....شو اللي غيرها .... من شو زعلانة .... كيف بدو يراضيها .......
بعد كم يوم كان عيد ميلادها ... فقرر انو يروح لعندها ويعايدها ..... واكيد رح يحكوا ويعرف السبب .....
راح الشب يوم عيد ميلادها ..... وماسك بايدو وردة ورايح .... بدو يشوف حبيبتو ... بس لما وصل لجنت بيتها .... كان زحمة كتير ....سيارات ... وناس ... وطبول ... وزمور ... وفرقة عراضة .... استغرب .... وقرب أكتر ليعرف شو في ..... ولما صار جنب باب البناية .... شاف وحدة متل القمر نازلة ...بالبدلة البيضاء .... كانت هيي ..... البنت اللي حبها ...... وجنبها ....رجال كبير بالسن ..... شافتو وكانت الدمعو بعيونهن اتنيناتهن ...... ماكان منو غير انو راح وبعد وهوي لسا بحالة صعبة ومو عرفان ومو مصدق شو اللي صار ...... لحتى بعد يومين بعتتلو رسالة اعتذار ع كل اللي صار وكانت كاتبي : انا بدي عيش حياتي ... بدي كون متل باقي البنات .... بدي يكون عندي كل شي ...... سيارة وبيت ومال ... وروح وايجي ......
وختمت رسالتها .... بهالجملة : الحب وحده ما بيكفي .... الحب وحده ما بيكفي .....


شو رأيكن ...... معقول كلام البنت صح ..... معقول كان تصرفها صح ......
ياترى الحب وحده مو قادر انو يسعد الانسان ...... شو اللي بيسعد الانسان ... الحب ولا المال ؟؟؟
لو كنتو مكان هالبنت ..... رح تختاروا الحب ولا المال ؟؟؟؟ شو رح يكون موقفكن ؟؟؟


ياريت الكل يحط رأيه ... وأنا أكيد رح قلكن رأيي بس مو هلأ .... لحتى أسمع أرائكن بالأول ......